Fólk frá Náttúrugripasavninum fóru beinanvegin norður, og tey raktu við, at hetta vóru rissospringarar. Bert eina ferð áður hevur verið boðað frá, at hetta hvalaslag hevur verið her á leiðini. Tað var í summar, tá ið ein bátur undir Føroyum boðaði frá, at hann hevði sæð nakrar rissospringarar.

Teir tríggir rissospringararnir vóru tveir kallhvalir - ein kynsbúgvin og ein ókynsbúgvin  - og ein kynsbúgvin kvennhvalur.

Rissospringari Grampus griseus er eyðkendur við, at hann hvítnar eftir bakinum við aldrinum, og hetta sást klárt á tí stóra kallhvalinum. Samstundis verða øll tey ljósu arrini, ið hann fær í bardaga við aðrar hvalir, ella av høgguslokki ella súgara, verandi. Hetta ger, at hvalirnir síggja alsamt meiri skurslaðir út, sum teir eldast.

Nev hava tær ikki, og bert tenn í undirkjaftinum. Kúlan er heilt bleyt, eins og ein fótbóltur við ov lítlari luft. Siggið er bleytt eins og gel. Eitt eyðkenni er eina foyra mitt framman á kúluni. Hornið er stórt og spískt.

Kíkarnir vóru fullir av høgguslokki, ið er føðin hjá rissospringara.