Lívfrøðiligt margfeldi
2010-átak - Vika 2: Bleikja
10. januar 2010
Bleikja (Salvelinus alpinus) er laksafiskur; tað sæst á fitifjøðrini á bakinum. Bleikja skiftir lit eftir árstíð, aldri og kyni, stødd og staði, men hon líkist hinum sílasløgunum við blettum á síðuni. Búkurin er silvurhvítur, síðurnar blágráar við smáum reydligum og størri ljósum blettum, og bakið er dimmari.
Bleikja var upprunaliga bert í Leynavatni, og hon hevur livað avbyrgd í hesum vatni síðan seinastu ístíð. Síðan er bleikja slept aðrastaðni, m.a. á Mýrarnar oman fyri Vestmanna, har hon kann gerast yvir 40 cm long. Í Leynavatni verður bleikja í mesta lagi 20 cm long, og hon er funnin upp til 8 ára gomul.
Bleikja livir bert í Norðurhøvum, frá Nýfundlandi og allan vegin eystur norður um Evropa og Asia. Hon livir oftast í vøtnum og áum, men í t.d. Grønlandi livir hon eisini í sjónum; har ferðast hon millum vatn og sjógv sum sjósílið hjá okkum.
