“Blóman”, sum vit kalla summardái, er í veruleikanum nógvar evarska lítlar blómur – ein sokallað kurvablóma. Tað merkir, at hvør einasti lítli guli knubbi inni í miðjuni á summardáanum er ein blóma, og hvørt av teimum hvítu bløðunum úti á jaðaranum, er somuleiðis ein blóma.

Í gomlum døgum varð summardái nýttur sum heilivágur. Rasmus Rasmussen skrivar til dømis í “Gomul føroysk heimaráð” um summardáa, at hann varð nýttur í móti barnaormi. Tó skuldu tær hvítu randblómurnar fyrst ripast av, tí bert tær gulu diskblómurnar munaðu móti orminum. Pinkubørn skuldu ikki koma í samband við várgróður – har ímillum summardáa, og børn máttu ikki skrýða seg við kransum av summardáa, tí hetta kundi føra til gulusótt.