Skinflugan kann kallast eitt nyttudýr við tað, at hon heldur náttúruna reina, við millum annað at niðurbróta deyð djór. Skinflugur eru at finna á næstan allari jarðarklótuni, og tilsamans eru fleiri enn 1000 sløg funnin, men bert 52 av teimum eru skrásett í Norðurlondum.

Tað eru ivaleyst tey fæstu, sum gáa um tað, men í Føroyum hava vit higartil skrásett 5 ymisk sløg av skinflugu. Tann vanligasta av okkara skinflugum er hon, sum vit kalla ‘vanlig skinfluga’ (Calliphora vicina). Hon er at finna alla staðni í landinum, og er frammi alt árið. Norðurskinfluga (Calliphora uralensis) líkist sera nógv vanligari skinflugu, men hon sæst bert frá seint á vári til tíðliga á heysti. Um somu tíð eru tær tríggjar: øsreyð skinfluga (Calliphora vomitoria), skortgul skinfluga (Cynomya mortuorum) og glitskinfluga (Protophormia terraenovae) eisini frammi, men hesar eru fáar í tali og ikki skrásettar á øllum oyggjunum.