Føroyaskøra hoyrir til rósuættina. Bløðini eru lutfalsliga stór og formaði sum ein hond við 7-9 fingrum. Innasti triðingurin av fingrunum er samanvaksin og millum annað hetta eyðkennir føroyaskøruna í mun til hini trý skørusløgini hjá okkum – mikilskøra, sjeyskøra og hvasstent skøra. Fremsti parturin av blaðnum er djúpt tentur, men inn í millum ‘fingrarnar’ er kanturin slættur.

Føroyaskøra blómar í juni-juli og blómurnar eru grøn-gular, smáar og sita tætt saman. Tær hava ein ráman anga.

Føroyaskøra veksur í rókum, í homrum og skursli og er vanlig kring landið. Hon varð fyrst funnin í Føroyum, og hildið var tá, at hon var serføroysk, men seinni varð hon eisini staðfest í Íslandi.