Ein kjógvi við ringi á bleiv fyri stuttum funnin á La Barra strondina við Maldonado í Uruguai. Nummarið á ringinum segði okkum, at hesin kjógvin var ringmerktur í 15. juni í 2004 á Akrabergi í Suðuroy. Henda fráboðan, sum er 11.570 km frá merkingarstaðnum, er fyrsta fráboðan úr Suðuramerika og er fjarðasta fráboðan av kjógva merktur í Føroyum.

Nú tað er farið at vára, eru teir fyrstu morsniglarnir byrjaðir at gera um seg. Náttúrugripasavnið mælir fólki til at fara í hernað móti hesum óbodna gesti. Morsnigilin nørist sera skjótt, og tí er neyðugt at byrja beinanvegin, um tað skal bera til at halda honum niðri. Snigilin ger stóran skaða í urtagørðum, tí hann etur næstan alt, sum fyri er.